كونلوم قوشو قاناد چالماز سنسيز بير آن،آذربايجان،
خوش گونلرين گنتمير مودام خياليمدان،آذربايجان.
سندن اوزاق دوشسم ده من عشقين ايله ياشاييرام،
يارالانميش قلبيم كيمي،قلبي ويران آذربايجان.
بوتون دونيا بيلير سنين قودرتينله،دوولتينله
آباد اولوب،آزاد اولوب مولكي ايران،آذربايجان.
بيسوتوني اينقيلابدا،شيرين_وطن اوچون فرهاد
كولونگ وورموش اوز باشينا،زامان_زامان،آذربايجان.
وطن عشقي مكتبينده جان ونرمگي اويرنميشيك،
اوستاديميز دئيب هئچدير وطنسيز جان،آذربايجان.
قورتارماق چون ضاليملرين اليندن رئي شومشاديني،
اوز شومشادين باشدان_باشا اولوب آل قان،آذربايجان.
يارب،ندير بير بو قدر اولكلري قان ائتمگين،
قولوباغلي قالاجاقدير نه واختاجان آذربايجان؟
ايگيدلرين ايران اوچون شهيد اولوب،عوضينه
دردآلميسان،غم آلميسان سن ايراندان،آذربايجان.
اوولادلارين نه واختا دك تركي_وطن اولاجاقدير؟
ال_اله ونر،عوصيان ائله،اويان،اويان،آذربايجان.
بسدي فراق اودلاريندان كول الئدي باشيميزا،
در آياغا،يا آزاد اول،يا تامام يان،آذربايجان.
شهريارين اورگيد سنينكي تك ياراليدير،
آزادليقدير من ملحم،سنه درمان،آذربايجان.